काठमाडौं । यही मंसिर २८ गते हुन गइरहेको नेपाल पत्रकार महासंघको तीनै तहको निर्वाचनको सम्पूर्ण तयारी पूरा भएको केन्द्रीय निर्वाचन समितिले जानकारी दिएको छ। यस चुनावको लागि केन्द्र, प्रदेश, जिल्ला शाखा र प्रतिष्ठान शाखामा नयाँ नेतृत्व चयनका लागि शुक्रबार मतदान हुनेछ।
केन्द्रीय निर्वाचन समितिका संयोजक प्रा। चिरन्जीवी खनालका अनुसार उम्मेदवार मनोनयन प्रक्रिया समाप्त भएको छ र मतपत्र तयारी पनि पूरा भएको छ। केन्द्रीय समितिका पदाधिकारी र सदस्य, लेखा समितिका लागि मतपत्र छापेर प्रदेश निर्वाचन समितिको माध्यमबाट शाखामा पुर्याइएको छ। यसपटकको निर्वाचनमा केन्द्रीय समितिका लागि ३ प्रकारका मतपत्र राखिएका छन्।
केन्द्रीय पदाधिकारीका लागि हल्का निलो, प्रदेशबाट निर्वाचित हुने केन्द्रीय सदस्यका लागि सेतो र अन्य केन्द्रीय सदस्य तथा लेखा समितिका लागि हल्का गुलाबी रंगको मतपत्र वितरण गरिएको छ। प्रदेश कार्यसमिति र शाखा कार्यसमितिले आफ्ना लागि मतपत्रको ढाँचा र रङ चयन गर्नेछन्।
मतदाताले गोप्य मतदानबाट तीन तहको नेतृत्व चयनका लागि आफ्नो मत प्रयोग गर्नेछन्। मतदान स्थलमा उपस्थित हुने मतदाताले परिचयपत्रको म्यादको प्रमाण, नागरिकता प्रमाणपत्र, राष्ट्रिय परिचयपत्र वा नेपाल सरकारद्वारा जारी गरेको अन्य परिचयपत्रका साथ मतदान गर्नुपर्नेछ।
अध्यक्ष पदका लागि ४ उम्मेदवार
केन्द्रीय समितिको अध्यक्षका लागि चार जनाले उम्मेदवारी दिएका छन्। अध्यक्षका लागि देवीप्रसाद सापकोटा, निर्मला शर्मा, रमेश विष्ट र लालसिंह लामाले उम्मेदवारी दिएका छन्। वरिष्ठ उपाध्यक्ष पदका लागि गोविन्दप्रसाद चौलागाईं, दीपक आचार्य र रोसन पुरीले उम्मेदवारी दिएका छन्।
त्यस्तै, उपाध्यक्ष महिला पदका लागि गंगा पौडेल र नितु पण्डितको उम्मेदवारी परेको छ। समावेशी उपाध्यक्षमा उमिदप्रसाद बागचन्द, मोहनकुमार सिंह र सुभाषप्रसाद साहले उम्मेदवारी दिएका छन्। महासचिव पदका लागि जन्मदेव जैशी, प्रकाश थापा, रामप्रसाद दाहाल र लेखनाथ न्यौपानेले उम्मेदवारी दिएका छन्।
यस निर्वाचनको निर्णयसँगै पत्रकार महासंघले आगामी नेतृत्वको लागि चुनावको माहौल उत्साहित भइरहेको जनाएको छ।